Ermənistan Ədliyyə Nazirliyi Cinayət Məcəlləsinin 412-ci (Ərazi bütövlüyünün pozulması) maddəsinə əlavələr etməyi təklif edir. Dəyişikliklər suverenliyin inkarına və ya qismən məhdudlaşdırılmasına yönəlmiş müraciətlərin və ya hərəkətlərin cinayət məsuliyyətinə aid edilməsini nəzərdə tutur.
Layihə vahid hüquqi aktların e-draft.am saytında dərc olunub.
“Layihənin qəbulundan sonra zorakılıq və ya zorakılıq hədəsi yolu ilə Ermənistanın suverenliyinin tam və ya qismən məhdudlaşdırılmasına yönəlmiş hərəkətlər, habelə digər dövlətin və ya beynəlxalq və ya fövqəlmilli ictimai təşkilatın xeyrinə, həmçinin suverenlikdən imtina üçün ictimai çağırışlar cinayət əməli sayılacaq”, – deyə nazirlikdən bildirilib.
Qeyd olunur ki, layihənin məqsədi bilavasitə dövlətin suverenliyinin qorunmasına yönəlmiş cinayət-hüquqi tədbirlərin qəbul edilməsidir.
Ədliyyə Nazirliyi bu cinayətə görə cəza olaraq 12 ildən 15 ilədək müddətə azadlıqdan məhrumetmə cəzasının təyin edilməsini təklif edir. Layihənin ictimai müzakirəsi noyabrın 6-da başa çatacaq.
