Hindistanın şimalında yağışların səbəb olduğu daşqınlar və torpaq sürüşmələri nəticəsində 100-dən çox adam ölüb.
Bu barədə “India Today” telekanalı məlumat yayıb.
Hindistanın şimal-şərq bölgələrində leysanlar iyulun 8-də başlayıb, iki amilin – musson yağışları və Aralıq dənizi regionundan rütubətli hava kütlələrinin birləşməsi nəticəsində baş verib. Leysanlar Dehli rayonuna, Himaçal-Pradeş, Uttarakhand, Pəncab, Haryan, Racastan ştatlarına, Cammu və Kəşmirin birlik ərazisinə yağıb. Çərşənbə günündən etibarən Uttarakhandda güclü yağışlar davam edir.
Təbii hadisədən daha çox Himalay dağlarının ətəklərində yerləşən Himaçal-Pradeş əyaləti zərər çəkib. Burada çoxsaylı sürüşmə müşahidə olunub, bir çox yaşayış məntəqələri su altında qalıb. Şimal ştatlarının dağlıq bölgələrində yolların eroziya və su basması səbəbindən nəqliyyatın hərəkəti dayandırılıb, nəticədə 300-ə yaxın turist hələ də dağlarda qalıb. Ümumilikdə təbii fəlakət nəticəsində ştatda 80-ə yaxın insan həlak olub, yağışlar praktiki olaraq dayanıb, xilasetmə və bərpa işləri aparılır.
