“1986-cı ildə Alma-Atı tələbə qırğınları, 1990-cı ildə Bakıdakı 20 Yanvar qətliamı və s. kimi, 1989-cu il 31 dekabr hadisələrini də “KQB”-siz təsəvvür etməkmi olar?..”
Elə o dövrdən bəri belə bir versiya səslənir ki, Dünya Azərbaycanlılarının Həmrəyliyi Gününün əsasının qoyulduğu 31 dekabr 1989-cu il hadisələri guya xalq kütlələrini qızışdıraraq Bakıda öncədən planlaşdırılan Qanlı Yanvar qətliamına, yəni Azərbaycan paytaxtına qoşun yeritmək üçün bəhanə yaratmaq, həmçinin Azərbaycan Xalq Cəbhəsinin sağlam qüvvələrinin demokratik seçkilər yoluyla hakimiyyətə gəlməsinin qarşısını almaq üçün sovet “KQB”-si tərəfindən törədilib…
Azərbaycan Xalq Cümhuriyyəti və onun yaradıcısı olan Məhəmməd Əmin Rəsulzadə haqqında, eyni zamanda stalinizmin azərbaycanlı qurbanları barədə araşdırmaların müəllifi, tanınmış araşdırmaçı və tarixçi Nəsiman Yaqublu mövzu ilə bağlı Moderator.az-a açıqlamasında bunları söyləyib:
“SSRİ dövlətinin gücü onun hərbi sistemində və dediyiniz “KQB”(keçmiş Dövlət Təhlükəsizlik Komitəsi) sistemində olub. Bu təşkilatın, yəni “KQB”-nin əsası isə 1917-ci ildə Rusiyada bolşeviklərin hakimiyyət gəldiyi dövrdə qoyulub. İlk yaradıcısı Vladimir İliç Lenin, ilk sədri isə Feliks Edmundoviç Dzerjinski olub. İlk proqramında bilirsinizmi nə yazılıb? Yazılıb ki, bu təşkilatın əsas vəzifəsi “xalq arasında düşmən axtarmaqdır”. Yəni olmasa belə, kimisə düşmən etməlisən. SSRİ dövləti dağılanda 150 mindən çox insanın bu təşkilatla birbaşa əlaqəsi olduğu qeyd edildi. Söhbət rəsmi işçilərdən getmir. Yəni əslində sualınıza cavab olaraq sual verirəm ki, 1986-cı ildə Alma-Atı tələbə qırğınları, 1990-cı ildə Bakıdakı 20 Yanvar qətliamı və s. kimi, 1989-cu il 31 dekabr hadisələrini də “KQB”-siz təsəvvür etməkmi olar?..
Yeri gəlmişkən, saytınız vasitəsi ilə Dünya Azərbaycanlılarının Həmrəylik Günü və Yeni İl bayramı və münasibəti ilə redaksiya kollektiviniz də daxil olmaqla bütün xalqımızı təbrik edirəm…”
Sultan Laçın
