Şagird qarşısına qoyduğu hədəfə nail olmaq üçün lazım olan bilik və bacarıqları məktəbdən əldə edə bilirsə, məktəbdən yayınma ehtimalı əhəmiyyətli dərəcədə azalır. Məktəb yalnız tədris yeri deyil, həm də şagirdlərin həyat məqsədlərini formalaşdıran, onların sosial, emosional və intellektual inkişafını təmin edən bir məkandır. Lakin məktəbin təqdim etdiyi təhsil məzmunu və metodları şagirdin fərdi ehtiyac və maraqlarına cavab vermədikdə, bu, onların məktəbdən yayınmasına və əlavə təhsil mənbələrinə üz tutmasına səbəb ola bilər.
Millətin Səsi.az xəbər verir ki, bu fikirlərlə təhsil eksperti Kamran Əsədov çıxış edib. O bildirib ki, şagirdlərin məktəbdən istədiklərini alması, tədris prosesinin onların fərdi məqsəd və maraqlarına uyğunluğundan asılıdır. Əgər şagird birbaşa hədəflərinə uyğun biliklər əldə edə bilir, məsələn, imtahan hazırlığı, peşə bacarıqları və ya gələcək karyera üçün lazım olan təməlləri məktəbdə qura bilirsə, bu zaman onun əlavə dəstək axtarmağa ehtiyacı qalmır:
“Bu, həm də məktəbin kurikulumunun müasir və əmək bazarının tələblərinə uyğun olması ilə əlaqəlidir.
Məktəbin sosial mühiti və müəllim-şagird münasibətləri şagirdlərin məktəbə bağlılığını formalaşdıran əsas amillərdən biridir. Şagirdlər məktəbdə yalnız bilik deyil, həm də sosial qarşılıqlı əlaqələr, dəstək və motivasiya gözləyirlər. Əgər məktəb şagirdlər üçün motivasiyaedici bir mühit təmin edə bilirsə, onların məktəbdən yayınma ehtimalı azalar. Bununla yanaşı, müəllimlərin şagirdlərin fərdi potensialını dərk etməsi və onları fərdi yanaşmalarla dəstəkləməsi də məktəbdən yayınmanın qarşısını almaqda mühüm rol oynayır. Məktəb ənənəvi və dar çərçivədə qalırsa, şagirdlərin diqqəti məktəbdən kənara yönələ bilir.
Məktəbin rolu yalnız bilik ötürməklə məhdudlaşmamalıdır; o, şagirdlərdə öyrənməyə həvəs yaratmalı, onların qarşıya qoyduqları məqsədlərə çatmaq üçün özünəinamlarını artırmalıdır. Məktəb, şagirdlərin yalnız akademik deyil, həm də şəxsiyyət inkişafını dəstəkləyən bir məkana çevrilməlidir. Əgər şagird məktəbdə özünü inkişaf etdirə biləcəyi bir mühit görürsə, bu, onun məktəbə bağlılığını daha da artıracaq.
Təhsil sistemi, şagirdlərin fərdi maraqlarını və məqsədlərini nəzərə alaraq, onların ehtiyaclarına uyğunlaşmalı, daha çox interaktiv, praktik və məqsədyönlü olmalıdır”.
