Xətai 35 saylı Seçki Dairəsində heç bir gərginlikdən söhbət gedə bilməz, dairə və məntəqələr seçki məcəlləsinə tam uyğun olaraq öz işlərini fasiləsiz davam etdirir. Dairənin sədri İmran Hüseynəliyev isə səhhəti ilə bağlı müalicəyə gedib. O bundan əvvəl də iki dəfə açıq ürək əməliyyatı keçirib.
Bu sözləri Milletinsesi.az -a Xətai 35 saylı Seçki Dairəsinin katibi Dilarə İsmayılova həmin Dairə haqqında mətbuatda yayılan xoşagəlməz informasiyalara münasibət bildirərkən deyib. Onun sözlərinə görə, seçkinin təbliğat və təşviqat mərhələsindəyik. Dairə ərazisində namizədliyi qeydə alınmış namizədlərin təbliğat və təşviqat kampaniyaları da çox aktivdir. Kiçik şikayətlər olsa da hər şey normaldır.
Sonra o, “Dairə sədrinin bəhanə edib istehfası” haqqındakı şaələrə də aydınlıq gətirib: “Dairənin sədri İmran müəllim sinəsini açıb yarılmış bədənini göstərməlidir ki, mətbuat onun həqiqətən xəstə olmasına inansın? Namizədlərin arasındakı mübarizədən Dairəyə nə dəxli? Biz seçki prosesini həyata keçiririk, hər şey yüksək səviyyədədir və tam şəffaf seçki prosesi həyata keçiriləcək”.
Qeyd edək ki, 35 saylı Seçki Dairəsinin sədri İmran Hüseynəliyev səhəti ilə bağlı işdən çıxarılması haqqında ərizə yazıb. Dairənin əsas favoritləri “Yeni Müsavat” qəzetinin baş redaktoru Rauf Abbasov və Ümid Partiyasının sədri İqbal Ağazadədir. Bəzi internet saytları sədrin işdən uzaqlaşmasını Dairə ərazisində bu iki namizəd arasındakı gərginliklə əlaqələndirmişdirlər.
