C vitamini insanın sağlamlığında olduqca böyük rol oynayır. C vitamini
– zülallar, yağlar, karbohidratların mübadilə proseslərini normallaşdırır;
– kalsium, dəmir kimi vacib mikroelementlərin mənimsənilməsinə kömək edir;
– immun sisteminin fəaliyyətində böyük rol oynayır – virus və xərçəng əleyhinə təsiri olan interferon maddəsinin əmələ gəlməsində iştirak edir, orqanizmin infeksiyalar və allergenlərə qarşı olan davamlılığını artırır;
– kollagen zülalının sintezində iştirak edir;
– yaraların tez sağalmasına kömək edir;
– orqanizmi sərbəst radilkalların təsirindən qoruyur, qocalma proseslərini ləngidir;
– qanda şəkərin və xolesterinin səviyyəsini normallaşdırır;
– qanın qırmızı hüceyrələrinin yaranmasını stimullaşdırır, qanın laxtalanma proseslərini tənzimləyir;
– damarların və kapilyarların divarlarını möhkəmləndirir;
– orqanizmdə iltihabları azaldır;
– yoğun bağırsaq, qida borusu, sidik kisəsi, endometrium (uşaqlığın daxili qatı) və bəzi digər orqanların xərçəng xəstəliyinin profilaktikasında böyük rol oynayır.
– orqanizmə streslə mübarizədə kömək edir və s.
Bütün bunları nəzərə alaraq orqanizmdə C vitamininin defisiti yarananda bir çox orqan və sistemlərdə pozulmalar inkişaf edir.
Saglamolun.az oxucularını C vitamininin çatışmazlığına işarə edən ilkin simptomları ilə tanış edir:
1. Damaqların şişməsi və qanaması. C vitaminin daha ciddi defisiti zamanı dişlər laxlamağa başlayır və hətta tökülə bilər.
2. Dəridə göyərmələrin tez-tez əmələ gəlməsi, yaraların gec sağalması.
3. Saçların gec uzanması və tökülməsi.
4. Oynaqlarda ağrılar.
5. Soyuqdəymə xəstəliklərinə tez-tez tutulması və gec sağalması.
6. Bədən çəkisinin səbəbsiz artması. C vitamini piylərin parçalanmasını sürətləndirir və onun defisiti zamanı piy orqanizmdə daha tez toplanmağa başlayır.
7. Gün ərzində yorğunluq və zəiflik.
8. Dərinin quru və solğun olması, qırışların artması. C vitamini kollagenin sintezində iştirak edir. Kollagen zülalı isə dərimizi cavan və elastik edir.
9. Burun qanaxmaları. C vitamini kapilyar və damarların sağlamlığında çox böyük rol oynayır, damarların divarlarını möhkəmləndirir. C vitaminin çatışmazlığı zamanı kapilyar və damarlar zəifləyir. Nəticədə burunun içərisində yerləşən kiçik damarlar partlaya bilər ki, bu da qanaxmaya səbəb olur.
10. Dırnaqların nazik və zəif olması.
Xoşbəxtlikdən, orqanizmdə C vitamininin səviyyəsini artırmaq çətin deyil. Bunun üçün qidalanmada bu vitaminlə zəngin olan məhsulları artırmaq lazımdır. Bu məhsullar arasında: itburnu, qara qarağat, bolqar bibəri, kivi, kələmin bütün növləri, sitrus meyvələri, göyərtilər.
