“Özbəkistan və Azərbaycan hakimiyyətləri ümumi layihələri reallaşdırmaq məqsədilə birgə investisiya fondu yaratmağı planlaşdırır”.
Milletinsesi.az Report.az-a istinadən xəbər verir ki, bunu Özbəkistan Baş nazirinin müavini, investisiya və xarici ticarət məsələləri üzrə nazir Jamşid Xocayev Azərbaycanla Özbəkistan arasında əməkdaşlıq üzrə Birgə Hökumətlərarası Komissiyanın iclasında bildirib.
“Birgə layihələrin icrası üçün Özbəkistan-Azərbaycan İnvestisiya Fondunun yaradılması vacibdir. Biz bir həftə ərzində bu istiqamətdə yol xəritəsi hazırlamağa dair razılıq əldə etmişik”, – o qeyd edib.
Baş nazirin müavini vurğulayıb ki, Azərbaycan Prezidenti İlham Əliyevin Özbəkistana işgüzar səfəri zamanı neft-qaz, kimya, toxuculuq, kənd təsərrüfatı sahələri üzrə 500 milyon dollarlıq sənədlər paketi imzalanıb: “İndi onların vaxtında və keyfiyyətli şəkildə icrasını təmin etmək lazımdır”.
Azərbaycanla Özbəkistan arasında əməkdaşlıq üzrə Birgə Hökumətlərarası Komissiyanın sədri, iqtisadiyyat naziri Mikayıl Cabbarov iki dövlət arasında qarşılıqlı investisiya qoyuluşunu fəallaşdırmağın vacibliyini söyləyib: “Bu aspektdə birgə investisiya fondunun yaradılması və fəaliyyəti hər iki ölkənin investorlarına kömək edəcək və etməli olacaq yaxşı alət ola bilər”.
O, əməkdaşlığın perspektiv istiqamətləri sırasında enerji sənayesini xüsusi qeyd edib.
Nazir xatırladıb ki, iyulun əvvəlində SOCAR və “Özbəkneftqaz” arasında hər iki dövlətdə neft yataqlarının birgə işlənməsi, eləcə də bərpa olunan enerji və rəqəmsallaşdırma layihələrində əməkdaşlıq üçün yol xəritəsi imzalanıb: “Ticarət dövriyyəsinə gəlincə, bizim üçün ortamüddətli hədəfləri müəyyən etmək yaxşı olardı… Mən üç-dörd ildən gec olmayaraq, yüz milyonlardan deyil, bəlkə də bir milyard dollardan danışmağımızı istərdim”.
