Aİ ölkələri Alyaskada keçirilən Rusiya-ABŞ sammiti ilə bağlı ümumi bəyanatı operativ şəkildə qəbul edə bilməyiblər, ona görə də Aİ rəhbərliyinin, Aİ-nin 27 ölkəsindən beşinin liderinin və onlara qoşulan Böyük Britaniyanın bəyanatı ilə məhdudlaşıblar.
Milletinsesi.Az-ın xəbərinə görə, bəyanatın mətnini Avropa Komissiyasının rəhbəri Ursula fon der Lyayen “X” sosial şəbəkəsində dərc edib.
Sənəd “Aİ bəyanatı” əvəzinə belə adlanır: “Sədr fon der Lyayen, Fransa Prezidenti Emmanuel Makron, İtaliyanın Baş naziri Corcia Meloni, Almaniya Kansleri Fridrix Merts, Böyük Britaniyanın Baş naziri Kir Starmer, Finlandiya Prezidenti Aleksandr Stubb, Polşanın Baş naziri Donald Tusk və Avropa Şurasının sədri Antonio Koştanın bəyanatı”.
Şənbə günü (16 avqust) səhər tezdən Aİ-nin bütün 27 ölkəsinin səfirlərinin iclasının çağırılmasına baxmayaraq, görüşdən sonra ümumi bəyanat verilməyib.
Məzmununa görə, sənəd ABŞ Prezidenti Donald Trampın münaqişənin ilkin barışıq şərtləri olmadan uzunmüddətli nizamlanmasının zəruriliyi ilə bağlı əsas tezisini dəstəkləmir. O, yeni sülh təklifi deyil, Brüsselin bütün köhnə tezislərinin toplusunu təşkil edir – hərbi tədarük vədlərindən tutmuş ədalətli sülh tələblərinə qədər.
Avropa İttifaqı (Aİ) institutlarının, icmanın aparıcı ölkələrinin və Böyük Britaniyanın rəhbərləri Kiyevə silah tədarükünə məhdudiyyətlər qoyulmasından imtina edirlər, Ukraynanın Aİ və NATO-ya inteqrasiyasının dayandırılmasının əleyhinədirlər.
Oxu.Az-ın xəbərinə görə, bu barədə Avropa Komissiyası və Avropa Şurası rəhbərlərinin, həmçinin Almaniya, Fransa, İtaliya, Polşa, Finlandiya və Aİ-nin üzvü olmayan Böyük Britaniyanın liderlərinin Alyaskada Rusiya-ABŞ sammitindən sonra qəbul edilmiş birgə bəyanatında bildirilir.
“Ukrayna əsaslı təhlükəsizlik zəmanətlərinə sahib olmalıdır. Biz ABŞ Prezidenti Donald Trampın ABŞ-nin bu cür zəmanətləri verməyə hazır olması ilə bağlı bəyanatını alqışlayırıq. Ukrayna Silahlı Qüvvələrinə və üçüncü ölkələrlə hərbi əməkdaşlığa heç bir məhdudiyyət qoyulmamalıdır. Rusiyanın Ukraynanın Aİ və NATO-ya daxil olmasına veto hüququ ola bilməz”, – deyə sənəddə qeyd edilir.
Bundan əlavə, Avropa İttifaqı ölkələri Rusiyaya təzyiqləri davam etdirmək və sanksiyaları sərtləşdirmək qərarına gəliblər.
“Ukraynada qətllər davam etdikcə biz Rusiyaya təzyiq etməyə hazırıq. Biz ədalətli və davamlı sülh əldə olunana qədər sanksiyaları gücləndirməyə və Rusiya hərbi sənayesinə təzyiq göstərmək üçün iqtisadi tədbirləri genişləndirməyə davam edəcəyik”, – deyə mətndə bildirilir.
Qeyd edək ki, ABŞ Prezidenti Donald Tramp Alyaskada Rusiya lideri Vladimir Putinlə görüşündən sonra Avropa ölkələrinin rəhbərləri, Aİ rəhbərliyi və Volodimir Zelenski ilə telefon danışığı aparıb.
Avropanın “Politico” nəşrinin öz anonim mənbəsinə istinadən xəbər verdiyi kimi, Aİ səfirləri yüksək məxfilik şəraitində Brüsseldə Alyaska sammitinin nəticələrinə dair fövqəladə iclasda müzakirələr aparıblar – hər hansı sızmanın qarşısını almaq üçün “telefonlarsız və məsləhətçilərsiz”.
“İcmanın bütün 27 ölkəsini təmsil edən Aİ səfirlərinin fövqəladə iclası şənbə günü (16 avqust) səhər blokun növbəti addımlarını müzakirə etmək üçün çağırılıb. İnformasiya sızması riskini minimuma endirmək üçün səfirlərdən yüksək məxfilik şəraitində – köməkçiləri və mobil telefonları olmadan toplaşmaları xahiş olunub”, – deyə nəşr yazır.
