“Lakin Ermənistandan daha böyük hərbi təhdidlər gələrsə, o zaman Azərbaycan onları dayandırmaq üçün ciddi və bəlkə də qeyri-mütənasib cavab verə bilər…”
“Azərbaycan-Ermənistan sərhədində yeni silahlı insidentlərin baş verməsinə səbəb regiondakı geo-siyasi rəqabətdir”.
Moderator.az xəbər verir ki, bu fikri “Kavkazski uzel” nəşrinə müsahibəsində hərbi ekspert, Azərbaycan Müdafiə Nazirliyinin informasiya-analitik idarəsinin keçmiş əməkdaşı Azad İsazadə deyib.
“Belə görünür ki, Azərbaycan prezidenti ilə Ermənistanın baş nazirinin Münhen görüşündən sonra tərəflərin danışıqlar prosesini bərpa etmək barədə razılığa gəldiyi görüşdən sonra sərhəddə ötən ilin payızından bəri müşahidə olunan sakitlik hökm sürməli idi. Lakin bunun ardınca Nikol Paşinyan Fransaya səfər etdi və Azərbaycanı “müharibəyə hazırlaşmaqda” ittiham etdi. Bundan dərhal sonra Fransanın müdafiə naziri Ermənistana gəldi və o, bu ölkəyə hərbi yardımı artıracağını və təchizatı artıracağını, ona raket sistemləri ötürəcəyini vəd etdi. Və bunun ardınca Azərbaycan mövqeləri atəşə tutulub, amma rəsmi Bakı buna cavab verməyib. Belə bir təəssürat yaranır ki, Azərbaycan qəsdən təxribata çəkilir ki, Bakı erməni mövqelərinə zərbə endirsin və ya Ermənistan ərazisinə bir az daxil olaraq hansısa lokal əməliyyatlar keçirsin, sonra Azərbaycan tərəfi beynəlxalq hüququ pozmaqda ittiham edilsin. Bu, Avropa Birliyinin müşahidə missiyasının bəzi beynəlxalq sülhməramlı qüvvələrin sərhədə yerləşdirilməsinə və Bakıya qarşı sanksiyaların tətbiqinə təşəbbüs göstərməsinə səbəb ola bilər”- deyə davamında ekspert bildirib.
Şərhçinin sözlərinə görə, gərginliyin artması “Açıq ermənipərəst mövqe ucbatından indi vasitəçilikdən tamamilə təcrid olunmuş” Fransanın, eləcə də “Qərbdəki müəyyən dairələrin” maraqlarına cavab verir.
“Rusiyanı bu bölgədən sıxışdıraraq Ermənistanda hərbi mövcudluğunu təmin etmək üçün səbəb axtarırlar. Görünür, İrəvanda da bu istəkləri dəstəkləyirlər. Bunu Paşinyanın Moskvanın aparıcı rol oynadığı KTMT-də Ermənistanın iştirakının dondurulması ilə bağlı son bəyanatı da sübut edir”, – İsazadə qeyd edib.
Eyni zamanda, İsazadə yaxın gələcəkdə Azərbaycan və Ermənistan arasında yeni irimiqyaslı hərbi toqquşmaların mümkünlüyünə şübhə etdiyini bildirib.
“Azərbaycan öz ərazi bütövlüyünü bərpa etmək problemini həll edib. Düzdür, daha səkkiz kənd Ermənistanın nəzarətindədir. Lakin Ermənistan konstruktiv mövqe tutsa, onların azad edilməsi məsələsi sərhədin delimitasiyası zamanı həll oluna bilər. Digər tərəfdən, Ermənistanın hazırda Azərbaycanla müharibə aparmaq gücü yoxdur. Bakı Ermənistan tərəfinin xırda təxribatlarına reaksiya verməyəcək. Lakin Ermənistandan daha böyük hərbi təhdidlər gələrsə, o zaman Azərbaycan onları dayandırmaq üçün ciddi və bəlkə də qeyri-mütənasib cavab verə bilər”, – deyə hərbi ekspert vurğulayıb.
S.Laçın
