Azərbaycanın tanınmış simaları Türkiyədə keçiriləcək prezident seçkiləri ilə bağlı mövqelərini açıqlayıblar. Qardaş ölkənin siyasi gündəmini yaxından izləyən məşhurlar hazırkı prezident Rəcəb Tayyib Ərdoğana dəstək nümayiş etdirərək, onun yenidən dövlət başçısı seçilməsini istədiklərini bildiriblər.
14 may seçimləri barədə Modern.az-a danışan tanınmış şəxslər Türkiyə vətəndaşlarını ölkənin gələcəyi və rifahı naminə Ərdoğana səs verməyə çağırıblar.
Xalq artisti Nurəddin Mehdixanlı:
“Türkiyədə prezidentliyə namizədlərin hər birini tanıyıram. Amma bu gün həm Türk dünyasının, həm Türk Dövlətləri Təşkilatının, həm də Azərbaycanın maraqlarına cavab verən yeganə namizəd Rəcəb Tayyib Ərdoğandır. Ərdoğanın müəyyən istiqamətlərini, məsələn, dinlə bağlı müəyyən məsələləri qəbul etməyən insanlar ola bilər. Hər kəs eyni cür düşünmək məcburiyyətində deyil. Reallıq ondan ibarətdir ki, Ərdoğanı istəməyən güclər var. Bunlardan biri Amerikadır. Onlara idarə olunan Türkiyə lazımdır. Ərdoğanı istəməyənlər Fransa, İsveç, Avropa ölkələridir. Çünki Ərdoğan Türkiyəni Avropadan və Amerikadan bir çox sahələrdə asılılıqdan xilas edib. Bu gün Türkiyə müstəqil siyasət yeridir. Artıq onların tələblərinə “hə” deyən Türkiyə yoxdur. Ərdoğan Türkiyənin və Türk dünyasının maraqlarına uyğun olaraq daxili və xarici siyasətini qurub.
Düşünürəm ki, biz Türkiyənin daxili işlərinə qarışa bilmərik. Lakin inanıram ki, Türkiyə vətəndaşları ədalətli seçim edəcəklər. Biz haqqın və həqiqətin, Azərbaycanın, eləcə də Türk dünyasının maraqlarının yanında olmalıyıq. Türkiyə həm də bizim vətənimizdir. Azərbaycan istənilən zaman icazəyə ehtiyac olmadan birbaşa Türkiyə Cümhuriyyətinə müraciət edə bilirsə, Türkiyə Cümhuriyyəti də istənilən vaxt bizə müraciət edir. Biz bir millət, iki dövlətik. Bu gün dinini sevən, Azərbaycanı sevən, Azərbaycanın, Türk dünyasının maraqlarını sevən və özünü bu ailədən hesab edənlər Rəcəb Tayyib Ərdoğanım yanında olmalıdır. Mən şəxsən Türkiyə Cümhuriyyətini irəli apara biləcək və Türk millətinin maraqlarını qoruya biləcək yeganə namizədin Rəcəb Tayyib Ərdoğan olduğunu görürəm. Artıq 20 il əvvəlki Türkiyə deyil, indi sözəbaxan Türkiyə yoxdur. İndi öz maraqlarının yanında olan, öz maraqlarını müdafiə edən Türkiyə var. Azərbaycanı ən böyük layihədən kənarda qoyan bir şəxsin, PKK-a ilə birlikdə olan, terrror təşkilatını müdafiə edən partiya ilə birlikdə olan, seçkiyə birlikdə gedən namizədi müdafiə etmək Türk dünyasına, Azərbaycana və Türk dünyasının maraqlarına düşmənçilik və xəyanətdən başqa bir şey deyil”.
Xalq artisti, tanınmış teatr və kino aktrisası Səidə Quliyeva:
“Düzünü desəm, Ərdoğandan başqa digər namizədlərin fəaliyyətindən xəbərdar deyiləm. Sadəcə prezident seçkiləri olduğu üçün bir az məlumatım var. Mənim seçmək hüququm olsaydı, tərəddüd etmədən Ərdoğana səs verərdim. Çünki onun işləri və ölkəmizə olan münasibəti göz qabağındadır. Mən bir azərbaycanlı, Türk xanımı olaraq Ərdoğanı dəstəkləyirəm”.
Xalq artisti, müğənni Bilal Əliyev:
“Mən demək olar ki, namizədlərin hər birini tanıyıram. Amma qəti olaraq fikrim budur ki, Ərdoğan seçilsin. Kemal Kılıçdaroğlu Azərbaycana qarşı pis niyyətli insandır. O “İpək yolu”nu Azərbaycandan kənarda çəkmək istədiyini bildirib. Bütün dünya Azərbaycanı dəstəkləyir. Bütün dünya bilir ki, Azərbaycan xalqı haqq- ədalət, düzgünlük yolu tutur. Çünki biz Ulu Öndərimiz, Azərbaycanın xilaskarı, memarı, mənəvi atamız Heydər Əliyevin yolunu gedirik. Onun siyasətini layiqli davamçısı, Azərbaycan Respublikasının Prezidenti, Ali Baş Komandanımız İlham Əliyev uğurla davam etdirir. Bu gün Ərdoğanın rəhbərlik etdiyi Türkiyə bizim yanımızdadır, qardaş kimi hər işimizə dəstək göstərir. Kılıçdaroğlu kimi Azərbaycanın əleyhinə çıxan siyasətçilər prezident olmağa layiq deyil.
Mən Türkiyə xalqına müraciət edirəm. Onlara demək istəyirəm ki, seçkidə yalnız Ərdoğana səs vermək lazımdır. Çünki Ərdoğan Türkiyəni dünyanın ən nüfuzlu, lider dövlətlərindən birinə çevirib. Bəs Kılıçdaroğlu nə edib?
Xatırladım ki, Birinci Qarabağ müharibəsi dövründə Türkiyənin o zamankı rəhbəri Azərbaycana bir helikopter belə göndərməmişdi, bizə yardım etməmişdilər. Ancaq Ərdoğan 44 günlük savaşda Azərbaycanın yanında oldu, qələbəmizə bizimlə bərabər sevindi. Biz dostu da, düşməni unutmarıq. Bizi sevən, yanımızda olan namizədin qalib gəlməsini istəyirik”.
Əməkdar artist Sənubər İsgəndərli:
“Mən Ərdoğanının tərəfindəyəm. Ona çox böyük sevgim və simpatiyam var. İstərdim ki, 14 mayda Ərdoğan qalib gəlsin. Bizim seçimimiz Ərdoğandır”.
Kinoşünas, Əməkdar incəsənət xadimi Ayaz Salayev:
“Sözün açığı, mən siyasətlə maraqlanmıram. Bircə onu deyə bilərəm ki, Ərdoğanın bizə çox köməkliyi dəyib”.
Teleaparıcı Kamran Həsənli:
“44 günlük müharibə ərəfəsində Ərdoğan və onun komandası bizim sözümüzü dünyaya çatdırdılar. Yardım isə göz önündədir. Həm Ərdoğan, həm Hulusi Akar, həm də Çavuşoğlu bizim yanımızda oldular. Hesab edirəm ki, Türkiyə xalqı layiqli namizədə səs verərək, onu qalib edəcək. Türk milləti kimə səs verərsə, biz ona hörmətlə yanaşacayıq.
Amma Kılıçdaroğlunun xəritəni göstərib, “İpək yolu”nun Azərbaycandan yox, İrandan keçməsini nümayiş etdirməsi mənim üçün həqiqətən şok oldu. Ümumiyyətlə, bu, Azərbaycana, bütün görülən işlərə və türklüyə qarşı təhqir idi. Hesab edirəm ki, ya onun geosiyasətdən anlayışı yoxdur, ya da kiminsə sifarişini yerinə yetirir. Buna görə də biz seçkilərdə Rəcəb Tayyib Ərdoğana uğurlar arzu edirik”.
Aytac Əsədova
