Təbrik edirəm!
O da hamı kimi körpə vaxtlarında “inqa-inqa!”- deyə çığırıb. Onun da ilk sözləri- “ana”, “ata”, “baba”, “nənə” olub. Qəndə “qaqqa”, çörəyə “pəpə” söyləyib. Onu da odun sobasına əl uzatmaması üçün, valideynləri “cız” deyə fikrindən yayındırıblar. O da Günəşi, Ayı, ulduzları ilk dəfə görəndə heyrətlənib. Və ayların, illərin qanadında böyüyüb boya-başa çatıb, yeniyetmə olub. Sonradan yaşanan ağrı-acılar bir yana qalsın, ilk pasport alanda necə sevindiyini, tələbə adını qazananda keçirdiyi hissləri, sərbəst həyata atılanda “o”-dan necə başladığını, hansı çətinliklərdən keçdiyini təsəvvür etmək elə də çətin deyil. Ümumiyyətlə, insan ömrü dörd mərhələdən ibarətdir- yaranış, inkişaf, tərəqqi, geriyə qayıdış…
Bəli, əlahəzrət Zaman çox sərt və amansızdır. İnsanı illərin sınaqlarından keçirə-keçirə, necə deyərlər, bərkə-boşa sala-sala yetişdirir. Nəticədə yeni bir şəxsiyyət formalaşır. Həmin şəxsiyyət FENOMEN də ola bilər, görkəmli adam da və ya nüfuzlu insanlardan biri də…
Bu gün sizə cəmiyyətimizdə FENOMENlərdən biri- Qulu Məhərrəmlidən söhbət açmaq istəyirəm. Son illər elə bir ictimai, siyasi hadisə olmayıb ki, o, öz mənfi və ya müsbət münasibətini bildirməsin. Biganə qalmaq, danışmaq lazım gələndə susmaq, sonradan hamı danışanda dil-dil ötmək onun ruhuna yaddır…
Sözsüz ki, bütün FENOMENLƏR kimi, o da birmənalı qarşılanmır. Ümumiyyətlə, səhvləri deyən, problemləri qabardan, naqislikləri tənqid edən insanların sevənləri kimi, sevməyənləri də olur. Bunun isə bir səbəbi var- düz söz acı olar…
Xoşbəxt adamdır, düşüncələrdə, təfəkkürlərdə inqilab etməyi bacarır. Axı insanların həyat tərzi, dünyaya baxışları, yeniliklərə münasibəti dəyişməsə, köhnə qaydalardan qurtulmaq çətindir. Avropada, Amerikada olduğu kimi Azərbaycan cəmiyyətinin də tərəqqisində Fenomen şəxsiyyətlərin rolu danılmazdır…
Jurnalistika ixtisasdır və hər bir ixtisasın arxasında insan faktoru dayanır. İnsanlar isə müxtəlifdir, qorxağı da var, cəsarətlisi də. Ola bilsin ki, başqa ixtisas sahiblərinə cəsarət anlamı elə də vacib deyil, amma jurnalistikada bu keyfiyyət kəm olanda qabarıq şəkildə nəzərə çarpır…
O da cəmiyyətdə kifayət qədər cəsarətli jurnalist, mükəmməl SÖZ ADAMI kimi tanınıb. Öz sözünü deməyi bacaran, hadisələri olduğu kimi qələmə alan yazarlardandır. Kiməsə yarınmaq, üzgörənlik, nədənsə çəkinmək ruhuna yaddır. Hər dəfə onun haqqında söz düşəndə- kişi kimi yaşayır, kişi kimi də alnıaçıq, üzüağdır- kəlmələrini eşitmişəm. Məncə, bu deyim jurnalistin yaradıcılığına verilən ən böyük dəyərdir…
Bəli, bir FENOMEN kimi Azərbaycan jurnalistika tarixinə adı qızıl hərflərlə yazılıb. Adətən, söz adamları xəsis olurlar, özləri haqqında yaxşı rəy eşitməyi xoşlasalar da, başqaları haqqında xoş söz deməyə səy göstərmirlər. Bu baxımdan, Allah ondan səxavəti əsirgəməyib. Layiq bildiyi hər kəs haqqında xoş söz deməyə tələsib…
Qulu Məhərrəmli insan kimi də kamildir. Keçdiyi ömür yolunda gördüklərini saf-çürük edə bilib. Onların ən yaxşılarından dərs alıb. Yüksək insani dəyərləri özündə ehtiva edib. Və püxtələşdikcə zəmanəmizin görkəmli, nüfuzlu, ünlü şəxsiyyətlərindən birinə çevrilib, FENOMEN soydaşlarımızdandır. Hər bir uğuru xalqın sevgisinə bələnir…
Az qala unutmuşdum, Qulu müəllim ötən ay Bakı Dövlət Universitetinin Jurnalistika kafedrasına müdir təyin olunmuşdu, dekabrın 20-də isə bu vəzifəyə təyin olunması haqqında rəsmi əmr verilib. Təbrik edirəm! Düşərli olsun!
Hörmətlə, Elman Eldaroğlu
