Rəsmi Bakının Beynəlxalq Qırmızı Xaç Komitəsinin Qarabağdakı fəaliyyəti ilə bağlı narazılığı artır. Əsas tələb budur ki, təşkilat Azərbaycanın dövlət sərhədlərinə, qanunlarına hörmət etməli, fəaliyyətində şəffaf olmalıdır.
“Müstəqil, bitərəf, qərəzsiz fəaliyyət”. Sadə azərbaycanlıların adını, demək olar ki, hər gün eşitdiyi Beynəlxalq Qırmızı Xaç Komitəsi (BQXK) münaqişə bölgələrindəki fəaliyyətinin məhz bu prinsiplərə əsaslandığını iddia edir. Lakin təşkilatın Azərbaycanın suveren ərazilərində, müvəqqəti rus sülhməramlılarının nəzarətində olan Qarabağ bölgəsindəki fəaliyyəti heç də qeyd etdiyimiz prinsiplərə uyğun gəlmir.
“Kaspi.az” mövzu ilə bağlı məqalə dərc edib.
“Qırmızı Xaç”ın nüfuzuna ciddi zərbə
Son bir neçə ayda Laçın sərhəd buraxılış məntəqəsində yaşananlar bu qənaətə gəlməyə ciddi əsas yaradır. Azərbaycan humanizm prinsipini əsas tutaraq, Qarabağdakı xəstə ermənilərin BQXK vasitəsilə Ermənistan və əks istiqamətdə hərəkətinə imkan yaratdı. Lakin BQXK maşınlarında çoxsaylı qaçaqmalçılıq məhsulları aşkarlandı. Hansı ki, bu, beynəlxalq humanitar hüququn aşkar şəkildə pozulması idi. Bu, BQXK-nın humanitar mandatına və beynəlxalq nüfuzuna ciddi zərbə vurdu.
Cinayətkarlar “xəstə” adı ilə qaçırılır
BQXK-nın Qarabağdakı “humanitar fəaliyyət”ini zərbə altında qoyan hadisələrin kuliminasiya nöqtəsi isə 1990-cı illərin əvvəllərində Xocalı rayonunun Meşəli kəndində onlarla silahsız dinc azərbaycanlını qətlə yetirən Vaqif Xaçatryanın sərhəddə hüquq-mühafizə orqanları tərəfindən saxlanılması oldu. Soyqırımı cinayətləri törədən bu şəxs məhz BQXK tərəfindən Ermənistana “xəstə” adı ilə aparılırdı. Sual yaranır: təşkilat kimləri apardığını araşdırmayıbmı? BQXK-nın 30 ildən artıq beynəlxalq axtarışda olan şəxsin kimliyi və əməllərindən xəbərdar olmaması barədə bəhanələri isə sadəcə nonsensdir.
Meşəli qətliamında bilavasitə iştirak etmiş Vaqif Xaçatryanın həbsi separatçıları da təşvişə salıb. Təşvişin səbəbi isə bəllidir. Cinayətkarların BQXK çətiri altında ədalət məhkəməsindən qaçmaq imkanları artıq əllərindən çıxıb. Cinayətlərin üzərindən nə qədər keçsə də, canilər mütləq məsuliyyətə cəlb edilirlər.
Azərbaycanlıların taleyinə biganə münasibət
Əslində BQXK-nın fəaliyyəti zamanı işğala məruz qalan Azərbaycan və bu işğalın, həmçinin çoxsaylı soyqırımların qurbanına çevrilmiş azərbaycanlıların taleyinə biganə münasibəti heç kimə sirr deyil. Faktlara diqqət yetirək:
90-cı illərdə BQXK 54 nəfər azərbaycanlı əsirlə bağlı izə düşmüş, Ermənistan tərəfi ilə dialoq nəticəsində onlardan 17 nəfərinin meyitlərini alaraq Azərbaycan tərəfinə təhvil vermişdi. Ancaq həmin siyahı üzrə 37 nəfərin taleyi hələ də bilinmir. Bu barədə təşkilat da hansısa açıqlama vermir. Azərbaycan tərəfi ilə BQXK arasında həmin 54 nəfərin əsirlikdə olduğunu təsdiq edən yazışmalar indi də durur. Şahid ifadələri zamanı terrorçu ermənilərin əsir azərbaycanlıları öldürərək onların orqanlarını satmasına dair çox ciddi ehtimallar var. BQXK-nın bu məsələdəki susqunluğu isə çox ciddi ittihamları özündə cəmləyən açıq suallar doğurmaqdadır.
Digər bir fakt. Hələ işğal davam edən zaman – 2000-ci illərdə BQXK rəsmi Bakının razılığı olmadan Xankəndidə “ofis”ini açdı, hətta separatçı rejimlə “saziş” də imzaladı. Azərbaycan tərəfinin dəfələrlə rəsmi müraciətlərinə baxmayaraq, həmin “saziş” konfidensiallıq adı altında gizlədildi, təqdim olunmadı. Lakin rəsmi Bakının israrlı araşdırmalarından sonra təşkilatın “Xankəndi ofisi”nin Bakıdakı nümayəndəliyə deyil, İrəvandakı nümayəndəliyinə tabe etdirildiyi ortaya çıxdı.
BQXK beynəlxalq qurumlara çağırış etməlidir
İndi isə Azərbaycan humanitar yardımlar üçün Ağdam-Xankəndi yolunu təklif edir. Bu təşəbbüs bir çox beynəlxalq təşkilatlar və vasitəçilər tərəfindən də dəstəklənir. Amma BQXK susur. Təşkilat nədənsə unudur ki, Laçın yolunun bağlanmasına əsas səbəb ermənilərin təxribatlarıdır. Humanitar yardım üçün Ağdam-Xankəndi yoluna beton sədlər çəkən də azərbaycanlılar yox, məhz separatçılar və onların əlaltılarıdır. Humanitar missiya fəaliyyətini təşkil edən beynəlxalq qurum olaraq BQXK məhz bu yolun açılması və humanitar yüklərin daşınmasına şərait yaradılması üçün separatçılara, beynəlxalq qurumlara çağırış etməli, Azərbaycanı beynəlxalq səviyyədə “hədəf”ə çevirmək istəyənlərin dəyirmanına su tökməməlidir.
“Xankəndi ofisi” niyə Bakıya yox, İrəvana tabedir?!
Azərbaycanın BQXK ilə bağlı tələbləri ən yüksək səviyyədə də ifadə olundu. Prezident İlham Əliyev “Euronews” kanalına müsahibəsində ölkəmizə qarşı “humanitar tələblər” irəli sürənlərə cavab olaraq BQXK-nın Qarabağdakı fəaliyyətinə dair mühüm açıqlamalar verdi. Qırmızı Xaç Komitəsinin yük maşınlarının yoxlanılması zamanı siqaret, “iPhone”lar və benzin kimi məhsulların qaçaqmalçılıqla keçirilməsinin aşkarlandığını deyən Prezident İlham Əliyev bildirib ki, təşkilat özü də bunu etiraf etdi: “Bildirdi ki, onlar buna görə heç bir məsuliyyət daşımırlar. Lakin bu yük maşınlarının üzərində Qırmızı Xaçın emblemi var idi və sürücülərin uniformaları üzərində də emblemlər var idi. Beləliklə, yol yenidən bu şəkildə bağlanıldı və biz Qırmızı Xaç Komitəsindən buna son qoyulmasını və bizimlə daha konstruktiv işləməsini xahiş etdik. Çünki əfsuslar olsun ki, bu günə kimi onların Qarabağdakı ofisi Bakı ofisinə yox, İrəvandakı ofisə tabedir. Bu da yolverilməzdir. Çünki bütün dünya Qarabağı Azərbaycanın bir hissəsi kimi tanıyır. Hətta, Ermənistanın baş naziri dəfələrlə “Qarabağ Azərbaycandır” söyləyib. Bəs nəyə görə Qırmızı Xaç Komitəsinin Xankəndidəki ofisi Bakı ofisinə yox, İrəvandakı ofisə tabedir? Bu, bizim legitim tələbimizdir”.
Göründüyü kimi, Azərbaycan rəhbərliyi, dövləti və cəmiyyəti ümummilli maraqların təminində, soydaşlarımıza qarşı cinayət törədənlərin ədalət məhkəməsinə təslim edilməsində, ölkəmizi təhdid edən istənilən qurumun və təşkilatın qanunlarımıza mütləq riayət etməsində vahid mövqe nümayiş etdirir. Bu iradəni heç bir qüvvə dəyişə bilməz.
