Brüsseldə keçirilən üçtərəfli görüş ərəfəsində Ermənistan sərhəddə təxribatarı davam etdirir. Mayın 10-dan başlayaraq Ermənistan ordusu Azərbaycan mövqelərini müxtəlif atıcı silahlar, minaatanlar, artilleriya qurğuları və pilotsuz uçuş aparatları ilə atəşə tutub.
Müdafiə Nazirliyinin məlumatına görə, Ermənistan silahlı qüvvələrinin Tovuzqala rayonunun Güləli, Basarkeçər rayonunun Əzizli və Qarakilsə rayonunun Saybalı yaşayış məntəqələri istiqamətlərində yerləşən mövqelərindən Ordumuzun Tovuz rayonunun Qoşa, Kəlbəcər rayonunun Yellicə və Laçın rayonunun Minkənd yaşayış məntəqələri istiqamətlərində yerləşən mövqeləri hədəfə alınıb. Bundan başqa, Rusiya sülhməramlı qüvvələrinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən Azərbaycan Ordusunun Tərtər, Xocalı, Şuşa və Laçın rayonları istiqamətlərində yerləşən mövqeləri müxtəlif çaplı atıcı silahlardan fasilələrlə atəşə tutulub.
Təxribat nəticəsində Azərbaycan ordusunun 2 hərbçisi – Novruzəlizadə Orxan Elxan oğlu və Qarayev Məhəmməd Mahir oğlu şəhid olub, 1 hərbçimiz yaralanıb. Ordumuzun cavab tədbirləri nəticəsində Ermənistanın da ölü və yaralıları var.
Üçtərəfli görüş öncəsi ermənilər bir neçə gündür davam edən təxribatı nəyə hesablanıb və Azərbaycanın cavabı nə olacaq?
Məsələ ilə bağlı Modern.az-a danışan Milli Məclisin Qarabağdan olan deputatı Elman Məmmədov bildirib ki, ermənilər bu təxribatı əvvəlcədən planlaşdırıblar:
“Ermənilər 10 gün bundan öncədən dezinformasiya yaymağa başlamışdılar. Qeyd edirdilər ki, mayın 10-dan etibarən Azərbaycan sərhəd bölgəsindən Ermənistana qarşı hərbi müdaxiləyə, hücuma hazırlaşır. Bu, elə-belə söz deyildi. Bu, erməni hiyləsi idi. Bunu bütün müvafiq qurumlara, beynəlxalq ictimaiyyətə yayırdılar. Yəni, ermənilərin təxribatlara başlayacağı əvvəlcədən planlaşdırılmışdı. Bundan əvvəl informasiya hazırlığı görürdülər. Mayın 10-u axşamdan təxribatlar törətməyə başladılar. Mayın 11-i və 12-sində də buna davam etdilər. Ola bilsin ki, bu gün də davam edirlər. Bu məqsədlidir. Brüsseldə olan görüşə hazırlıq məqsədi güdür. Paşinyan sabahkı görüşdə “mən sizə qabaqcadan Azərbaycanının belə hadisələr törədəcəyini demişdim. Gördünüzmü, dediyim oldu” deyəcək. Bundan əlavə, Paşinyan 9 may ərəfəsində Moskvaya getdi. Moskvadan nə tapşırıqlar aldısa, gələn kimi hərbi rəhbərliyi topladı. Nə müzakirələr etdilərsə, təxribatlar başladı. Yəni bunların əməlləri bir mərkəzdən yox, bir neçə mərkəzdən idarə olunur. Bunlar belə əməllər törətməklə bir növ özlərini yazıq, hücuma məruz qalan tərəf kimi göstərməyə çalışırlar. Bütün erməni saytları yazır ki, hücuma, təxribata Azərbaycan başlayıb. Biz cavab verib, özümüzü qoruyuruq. Bu onların murdar məkirli oyunudur. Doğrudur, Azərbaycan Ordusu şəhidlərimizin qisasını alır. Ermənistanın mövqeləri, hərbi texnikası, canlı qüvvəsi kifayət qədər məhv edilib və məhv ediləcək”.
Deputat deyir, bu gedişat ermənilərin sülh istəmədiyini göstərir:
“Gedişat bizə onu deməyə əsas verir ki, onlar sülh istəmir. Təkcə desək, bunlar sülhə hazır deyillər, bu, kifayət etməz. Bizlə sülh şəraitində qonşu kimi yaşamaq, bizə qarşı ərazi iddialarından əl çəkmək niyyətində deyillər. Azərbaycanın Qarabağ ərazisindəki bir neçə min nəfər erməniyə görə min cür qeyri-mümkün təkliflər irəli sürməklə, Azərbaycanın daxili işlərinə qarışmaqla məşğuldurlar. Yəni Azərbaycan ərazisindəki separatçılara öz büdcələrindən maliyyə yardımı ayırmaq və hərbi güclərini bu günə qədər orada saxlamaq kimi məsələlər Azərbaycanın daxili işlərinə qarışmaq deməkdir. Cənab Prezidentin dediyi kimi, bunlar sülh istəmirlərsə, sülh olmayacaq. Biz tarixi dədə-baba torpaqlarımızı ermənilərdən tamamilə təmizləmək məcburiyyətində qalacağıq”.
E.Məmmədov görüşlərdən heç nə gözləmədiyini vurğulayıb:
“Mən danışıqlardan heç bir nəticə gözləmirəm. Hətta deyərdim ki, sülh sazişi adlı sənədə imza atmalı olsalar belə, ermənilər ona da əməl etməyəcəklər. Biz bunu 2020-ci ilin 10 noyabrından bu yana görürük. Həmin dövrdə imzalanan üçtərəfli sənədin müddəalarına Ermənistan əməl edirmi, yox. Ondan sonra keçirilən görüşlərdə alınan qərarlara, bəyanatlara əməl olunurmu, yox. Yəni tərəflər arasında ya Rusiyanın, ya Avropanın, yaxud Amerikanın vasitəçiliyi ilə sülh sazişi imzalansa da, ermənilər buna əməl etməyəcək. Bunlar bütün tarixboyu Türkiyəyə, Azərbaycana qarşı ərazi iddiaları ediblər və edəcəklər”.
Deputat ermənilərin qarşısını almaq üçün bir neçə yolun olduğunu qeyd edib: “Bunun qarşısını almaq üçün bir neçə yol var. Birincisi, Azərbaycan güclü dövlət kimi günü-gündən hərbi gücünü daha da artırmalıdır. Həmişə hazır vəziyyətdə olmalıyıq. 1964-ci il ərəfəsində ermənilər yenə Qarbağın dağlıq hissəsinin Ermənistana birləşdirilməsi istiqamətində SSRİ rəhbərliyinə müraciət edib. Onda SSRİ dövlətinə rəhbərlik edən Nikita Xuruşov belə bir fikir bildirmişdir ki, “əgər Qarabağdakı ermənilər Ermənistana birləşmək istəyirlərsə, mən 12 min hərbi yük maşınını ora göndərərəm. Onlar da bir gün ərzində Qarabağdakı erməniləri Ermənistan ərazisinə apara bilərlər. Gedib orada birləşsinlər”. İndi bizim çıxış yollarımızdan biri də Xuruşovun dediyi məsələyə istinad etməkdir. Bütün ermənilər ərazilərimizdən təmizlənməlidir ki, bu məsələ və iddialar aradan qaldırılsın. Digər yandan nə qədər ki, bunlar qonşuluqdadırlar, Cənubi Qafqazdadırlar dinc dayanmayacaqlar. Bu təxribatlar, atışmalar olacaq. Yeganə çıxış yolu bunların tamamilə başlarını əzmək, diz çökdürmək və silahsızlaşdırıb tabe etməkdir. Çox təəssüf ki, bu gün ədalətsizliklə idarə edilən dünyada Fransa, cənub qonşumuz İran və şimal qonşumuz Rusiya kimi dövlətlər, beynəlxalq qurumlar bunları qidalandırmaqla, təlimatlandırmaqla və silahlandırmaqla məşğuldurlar. Əgər buna silah verilirsə və belə deyək ki, ona hüquqi-siyasi müstəvidə vədlər verilirsə, qudurur, cızığından çıxır. Sonda belə təxribatlarla məşğul olur. Bütün bunlara görə Azərbaycan güclü olmalıdır ki, onların layiqli cavabını alsın. Necə ki, bu neçə gündə layiqli cavabları verilsin. Mövqeləri darmadağın edilir. Canlı itkiləri ilə bağlı gizlədikləri məlumatları elə öz KİV-ləri təkzib edirlər. Bildirirlər ki, itkiləri daha çoxdur”.
