Cari ilin 1 yanvar tarixində İrəvanda faşistlərin təntənəli yürüş keçirməsi respublikamızla yanaşı, bəzi ölkələrdə də ciddi narahatlıqla qarşılanıb. Belə ki, Rusiya Xarici İşlər Nazirliyinin rəsmi nümayəndəsi Mariya Zaxarova bu gün keçirdiyi brifinqdə bu məsələyə toxunub, baş verənlərlə bağlı ölkəsinin narahatçılığını bildirib.
Mövzu ilə bağlı Moderator.az-a açıqlama verən görkəmli media eksperti, professor Cahangir Məmmədli erməni faşizminin bütün dünya üçün ciddi təhlükə mənbəyi olduğunu vurğulayıb:
“Ermənistan bütün dünyada faşizmin mövcud olduğu, müdafiə edildiyi və öz mövcudluğunu təntənəli şəkildə nümayiş etdirdiyi ölkədir. “Faşizm” sözü belə onların qanlı əməlləri qarşısında sönük qalır və humanist səslənir. Onlara “faşist” ifadəsindən də betər, bu sözdən də dəhşətli bir ifadə tapmaq lazımdır.
Hesab edirəm ki, erməni faşizmi Prezidentimizin yanvarın 10-da telekanallara verdiyi müsahibədən, bu müsahibədəki fikirlərdən nəticə çıxarmalıdır. Görməlidirlər ki, Azərbaycan Prezidenti başda olmaqla, xalqımız necə böyük bir ləyaqətə sahibdir. Anlamalıdırlar ki, xalqımız bunca böyük qələbədən sonra, ermənilərin bunca vandallığından sonra humanistlik göstərərək sülhə imza atmağa hazırdır. Bunu anlamayan, dərk etməyən bir ölkədə faşizmin at oynatması təəccüblü deyil.
Hesab edirəm ki, erməni faşizmi beynəlxalq arenada ifşa edilməli, dünya ictimaiyyəti Ermənistandakı faşizm hərəkatının bütün bəşəriyyət üçün necə böyük təhlükə mənbəyi olduğunu anlamalıdır”.
Seymur ƏLİYEV
