Britaniyanın Baş naziri və İngiltərənin “Norviç Siti” futbol klubunun tanınmış pərəstişkarı Liz Tras qalmaqalın əsas fiquruna çevrilib.
“Report” xəbər verir ki, bu barədə “Daily Mail” məlumat yayıb.
Məlumata görə, baş prokuror Emili Thornberri Böyük Britaniya Xarici İşlər Nazirliyinə 2021-ci ilin sentyabrından 2022-ci ilin iyuluna qədər 45% artan xərcləri ilə bağlı məktub göndərib.
O, müraciətdə yüksək səviyyəli şəxsi yeməklərə, sağlamlıq və gözəllik müalicələrinə, külli miqdarda ingilis şərabına və interyer əşyalarına, habelə “Norviç” fan-şopunda 1,841 funtun xərclənməsini şübhə altına aldığını qeyd edib.
Baş nazir Liz Trasın Xarici İşlər Nazirliyinə rəhbərlik edərkən qeyd olunan məbləği “Norwich City” klub mağazasında xərclədiyi deyilir. Bu vəsaitlər dövlət büdcəsinin bir hissəsidir.
Qeyd edək ki, Britaniya Xarici İşlər Nazirliyinin nümayəndələri hesabatla bağlı ilkin sorğuya cavab vermədiyi üçün ölkənin baş prokuroru öz müraciətini tviter hesabında dərc edib.
