İşğaldan azad edilən ərazilərdə genişmiqyaslı quruculuq işlərində gömrük orqanları bir sıra işlər görməkdədir . Bəs görəsən Dövlət Gömrük Komitəsi bu istiqamətdə hansı işlər görülüb?
Mövzu ilə bağlı Moderator.az -ın sorğusuna Gömrük Komitəsindən cavab olaraq bildirildi ki, Azərbaycan Respublikası ilə İran İslam Respublikası dövlət sərhədində, Şərqi Zəngəzur iqtisadi rayonuna daxil olan Zəngilan rayonu, Ağbənd qəsəbəsi ərazisində yeni sərhəd buraxılış məntəqəsinin kompleks tikintisi üzrə ilkin konseptual layihə versiyası hazırlanıb və layihə-smeta sənədlərinin hazırlanması üçün podratçı təşkilatla müqavilə bağlanılıb. Hazırda proses layihələndirmə mərhələsindədir və aidiyyəti qurumlar ilə danışıqlar aparılır.
Azərbaycan Respublikasının işğaldan azad edilmiş ərazilərində dövlət sərhədindən buraxılış məntəqələrində yaradılmış “Eyvazlı”, “Qazançı”, “Laçın”, “Zəngilan beynəlxalq hava limanı” və “Füzuli beynəlxalq hava limanı” gömrük postları zəruri ilkin texniki avadanlıqlar və digər ləvazimatlarla təmin edilib, həmin postlarda lokal şəbəkələr qurulub, gömrük xidmətinin korporativ şəbəkəsinə qoşularaq zəruri təhlükəsizlik tədbirləri həyata keçirilib.
