“Bu həftə sonu Bakı, Sumqayıt, Gəncə, Lənkəran şəhərləri və Abşeron rayonunda bütün marketlər və apteklər bağlı olacaq”.
Milletinsesi.az-ın məlumatına görə, bunu bu gün Nazirlər Kabineti yanında Operativ Qərargahın təşkil etdiyi mətbuat konfransında TƏBİB İdarə Heyətinin sədri Ramin Bayramlı bildirib.
O deyib ki, dərmana ehtiyac olarsa, təcili yardım xidmətləri təmin edəcək: “Fəaliyyətinə icazə verilən qurumların əməkdaşları öz avtomobilləri, həmin qurumların xidməti maşınları ilə işə gətirilə bilər. İmkanı olmayan qurumlar isə Bakı Nəqliyyat Agentliyinə müraciət edə bilərlər. İşə icazə verilən qurumların əməkdaşları isə icaze.gov.az-dan qeydiyyatdan keçməlidirlər”.
O, radio və televiziya əməkdaşlarının işə getməsi məsələsinə aydınlıq gətirilib.
Ramin Bayramlı bildirib ki, icazə verilən bütün qurumların əməkdaşları, o cümlədən radio və TV əməkdaşları icaze.e-gov.az portalında qeydiyyatdan keçməklə fəaliyyətlərini davam etdirə bilərlər.
