“Milan” baş məşqçisi Cennaro Qattuzo ilə yolları ayırıb.
Qol.az-ın İtaliya mətbuatına istinadən yaydığı xəbərə görə, klub rəhbərliyi ilə 41 yaşlı mütəxəssis arasında görüş zamanı bu qərar verilib.
Qattuzo görüşdən sonra istefası ilə bağlı bunları deyib: “Milan”dan ayrılmaq asan deyildi, amma bu qərarı vermək lazım idi. İki illik müqaviləmdən imtina edirəm. Çünki “Milan”la aramda pul məsələsi haqda danışa bilmərəm. Burada üzərimdə böyük təzyiq var idi. 18 ayda gecələri çox çətin yatdığımı söyləyə bilərəm. Mövsüm ərzində səhvlər etdik, amma yaxşı bir ili geridə qoyduq. Son 3-4 ayda isə istədiyimiz nəticələri əldə edə bilmədik. Komandama təşəkkür edirəm, 68 xal toplayaq Çempionlar Liqasına gedə bilməsək də, onlarla qürur duyuram”.
Qeyd edək ki, “Milan” A seriyasını 68 xalla 5-ci pillədə başa vurub. Komanda növbəti mövsüm Avropa Liqasının qrup mərhələsində çıxış edəcək.
