“OPEC plus”un son qərarı bazarda disbalansın qarşısını almaq məqsədi daşıyır və hasilat kvotalardan geri qaldığı üçün faktiki azalma tədarük artıqlığı ilə bağlı proqnoza uyğun, təxminən, 1 mln. barrel ətrafında olacaq.
Modern.az Energetika Nazirliyinə istinadən xəbər verir ki, bu barədə nazir Pərviz Şahbazov Moskvada keçirilən “Rusiya Enerji Həftəsi” Beynəlxalq Forumunda “Yeni çağırışlar – yeni imkanlar. Dünya neft-qaz bazarını nə gözləyir?” adlı panel müzakirələr zamanı deyib.
Azərbaycanın energetika naziri P.Şahbazov Moskvada neft bazarının balanslaşdırılması və “yaşıl enerji”nin inkişafından danışıb. Nazir yeni reallıqlarda qlobal neft bazarının balanslaşdırılması və “yaşıl enerji”nin inkişafı ilə bağlı fikirlərini bölüşüb.
Nazir deyib ki, “OPEC plus” bütün çoxsaylı, o cümlədən geosiyasi faktorların neft bazarına təsirlərini tamamilə aradan qaldıra bilməz. Lakin neftə tələbatın inkişafı ilə bağlı proqnozlara adekvat qərarları tələb-təklifin tarazlaşdırılmasına davamlı dəstək verir. Neft bazarının balanslaşdırılması üçün investisiyaların vacibliyinə diqqət çəkən nazir deyib ki, gələcəkdə neft çatışmazlığı və qiymət volatilliyinin qarşısını almaq üçün investisiya cəlbi zəruridir.
Həmçinin qeyd olunub ki, karbohidrogenlər dəyişən enerji arxitekturasında öz əhəmiyyətini saxlayacaq, lakin dünyada neft-qaz sektoru ilə bağlı mənzərə isə çox böyük ehtimalla fərqli olacaq.
Energetika naziri mövcud situasiyada “yaşıl enerji”nin inkişafından da danışıb. Hazırda daha çox bu enerji növünə siyasi və investisiya dəstəyi verildiyini vurğulayan nazir ötən il dünyada 257 QVt yeni bərpa olunan enerji güclərinin istifadəyə verilməsini, bu sahəyə 365 milyard dollar investisiya yatırılmasını “yaşıl enerji”nin inkişafını təsdiqləyən faktlar kimi qeyd edib. Bildirilib ki, bu gün heç də hamı “yaşıl enerji” ilə bağlı hədəflərini asanlıqla həyata keçirə bilmir. Belə ki, enerji keçidi prosesinin rasional şəkildə idarə edilməməsi enerji təchizatında problemlərlə nəticələndi. “Bu gün o ölkələr “yaşıl enerji” kursunu uğurla həyata keçirir ki, onların enerji təhlükəsizliyi ilə bağlı problemi yoxdur. Azərbaycan da belə azsaylı ölkələrdəndir. Hazırda beynəlxalq enerji şirkətləri ilə ümumi gücü 4700 MVt olan külək və günəş enerjisi üzrə istehsal gücləri yaradılır. Bir qədər sonra isə 6 GVt-lıq layihələrlə bağlı planlarımız var.”
Qeyd edək ki, paneldə Rusiya Federasiyasının baş nazirinin müavini Aleksandr Novak, Türkiyənin energetika və təbii sərvətlər naziri Fatih Dönməz, Qazaxıstanın energetika naziri Bolat Akçulakov və “Qazprom”un İdarə Heyətinin sədr müavini Aleksey Miller iştirak edib.
