Şərur rayonunun Vərməziyar kəndində şəhidlərimiz İbrahim Vəlizadə, Mikayıl Babayev və Elməddin Meydanovun xatirəsinə bulaq-abidə istifadəyə verilib.
Tədbirdə əvvəlcə şəhidlərimizin xatirəsi bir dəqiqəlik sükutla yad edilib, Dövlət Himni səsləndirilib.
Açılış tədbirində Naxçıvan Muxtar Respublikasında Azərbaycan Prezidentinin səlahiyyətli nümayəndəliyinin əməkdaşı Qoşqar Kamilov, Şərur Rayon İcra Hakimiyyətinin Başçısı Kamal Cəfərov, Naxçıvan Muxtar Respublikası əmək və əhalinin sosial müdafiəsi nazirinin müavini Nicat Babayev, Əlahiddə ümumqoşun ordunun, “Naxçıvan” Əlahiddə Sərhəd Diviziyasının əməkdaşları, rayon ictimaiyyət nümayəndələri, şəhidlərin ailə üzvləri, qazilər, kənd sakinləri, müəllim və şagird kollektivi iştirak ediblər.
Çıxış edənlər bildiriblər ki, Ümummilli Lider Heydər Əliyevin uğurlu yolunu davam etdirən Azərbaycan Prezidenti İlham Əliyevin hərbi sərkərdəliyi və siyasi liderliyi sayəsində Azərbaycan Silahlı Qüvvələri 44 gün ərzində düşmən ordusunu məhv edərək öz ərazi bütövlüyünü bərpa etdi. Vərməziyar kəndinin vətənpərvər övladları şəhid İbrahim Vəlizadə, Mikayıl Babayev və Elməddin Meydanov da torpaqlarımızın azadlığı uğrunda göstərdiyi şücaətlərlə seçiliblər. Canlarını Vətənə fəda edərək, qanlarını qurban verərək bayrağımızı zirvələrdə dalğalandırıblar. Xalqımızın bu igid oğulları ölkə Prezidenti İlham Əliyevin Sərəncamları ilə müxtəlif orden və medallarla təltif ediliblər.
Tədbirdə məktəblilər Vətənə və şəhidlərimizə həsr olunmuş şeirlər səsləndiriblər.
