“Türkiyə türkcəsini dövlət dili kimi qəbul etməliyik”.
Millətin Səsi.az xəbər verir ki, bunu “Qanun” Nəşrlər Evinin rəhbəri Şahbaz Xuduoğlu özünün sosial şəbəkə hesabında yazıb.
Sosial şəbəkələrdə bir sıra istifadəçilər tərəfindən tənqid edilən paylaşımda 30 ildir kitab nəşr etdiyini deyən Xuduoğlu bildirir ki, ölkədə yaxşı satılan kitabların sayı iki mini keçmir, yerli yazıçıların əsərlərin satışı isə daha zəifdir.
Kitabçının sözlərinə görə, əsas tərcümə ədəbiyyatı oxunur, onlardan isə oxucular narazılıq edir.
“Buna baxmayaraq, kitab bazarında rusca, türkcə, ingiliscə kitabların həcmi artmaqda davam edir. Bakıda rusca daha çox oxunur. Regionlarımız, gənclik isə türkcə oxumağa üstünlük verirlər. Müasir oxucular Dostoyevski, Tolstoy, Çexovu, Turgenovu və sair rus klassiklərini türkcə oxuyurlar”, – deyə Şahbaz Xuduoğlu qeyd edib.
O, ixtisaslı mütəxəssislər yetişdirən təhsil ocaqlarını normal dərsliklər yaza bilməməkdə ittiham edib.
“Tələbələr yalnız xarici dillər öyrənməklə dəqiq fənlər üzrə; tibb, iqtisadiyyat, kimya, fizika, riyaziyyat sahəsində biliklərini artırır, yaxud xaricdə təhsilə üz tuturlar…
Bizdə isə əksinədir. Dilimiz böyükdür deyirik, amma öz dilimizdə oxumuruq. İndi danışdığımız dil Şamaxı, Qazax ləhcəsindən yığılıb, ədəbi dil şəkilini alıb və göründüyü kimi, heç də hamının sevimlisi ola bilməyib. Dilimizin konstitusiya adı Azərbaycan dili olsa da, bu dil əyalətçilikdən xilas ola bilmədi, milli birlik yaratmadı.
Bütün elit obyektlərdə, restoran, hotellərdə rusca danışılır. Yüksəkvəzifəlilər öz aralarında rusca danışır. Bu günün özündə də rus məktəbləri Azərbaycan məktəblərini “yeyir”.
Özlərini intellektual, mədəni hesab edənlər bu dildə danışmırlar, heç danışmaq da istəmirlər. Adamlar var, bu ölkədə doğulur, ad, mənsəb sahibi olur, amma bu dili bilmirlər. Ona görə ki, zərurət görmürlər. Azərbaycanda daim rusca danışan, mən azərbaycanca bilmirəm deyən necə olur İstanbula düşən kimi türkcə danışmağa başlayır? Necə olur Azərbaycan şairlərindən bir şeir bilməyən rusdilli azərbaycanlı Nazim Hikməti əzbər bilir?
Gündəlik həyatımızın diqtəsinə qulaq asmaq zamanıdır. Təhsilimizi və ədəbi dilimizi dəyişməliyik”, – deyə kitabçı bildirib.
O iddia edir ki, Türkiyə türkcəsi böyük sürətlə Qafqaza yayılır, Gürcüstanda gürcü körpələri türk cizgi filmlərinə baxır, türkcə danışanları sayı xeyli artıb. Ərəb ölkələrində də türk serialarının böyük reytinqi var, onun sayəsində türkcə danışanlar da çoxalıb.
Şahbaz Xuduoğlu vəziyyətdən çıxış yolu kimi Türkiyə türkcəsinə keçidi göstərib.
“…Məhəlli türk şivəsindən həqiqi türkcəyə, Türkiyə türkcəsinə keçməyin zamanıdır. Bəlkə də gecikirik. Türkcəni qəbul etməklə görün, nə qədər üst-üstə yığılmış problemlər həll olacaq. Həmişə düşünmüşəm, yaxşı olacaq, dilimiz inkişaf edəcək. Ümid məni irəli aparır, reallıq isə geri çəkir. Yeganə inkişaf yolumuz Axundov irsinə qayıtmaq öz türkcəmizi qəbul etməyimizdir”, – deyə o, sözlərini yekunlaşdırır.
