“Orada məntiqə, hərbi qaydalara uyğun olmayan, süni xarakter daşıyan bir müharibə aparılır…”
Bu günlərdə 2024-cü ildə Putinin Odessa, Xerson, Nikolayev şəhərlərini də işğal edərək Ukraynanı Qara dənizdən tam təcrid etməyi planlaşdırdığı, Zelenskini isə əksinə, Krımı Rusiyadam təcrid etməyi hədəf götürdüyü haqda informasiyalar yayılır. Görəsən, kimin planının həyata keçməsi üçün real geo-siyasi şərait və imkanlar var?
Azərbaycanın sabiq baş diplomatı Tofiq Zülfüqarov Moderator.az-a açıqlamasında mövzu ilə bağlı bu fikirləri ifadə edib:
“Bilirsiz, əvvəla, hesab edirəm ki, bu müharibə hansısa kənar qüvvələrin təsiri nəticəsində baş verən bir savaşdır… Və həmin qüvvələr üçün bu müharibənin nəticəsi əsas maraq kəsb etmir. Onlara, sadəcə bu proses lazımdır. İndi, bu proses nəticəsində Odessa kimin əlinə keçəcək, Krım kimin əlində qalacaq və s. o güclər üçün ikinci dərəcəli məsələlərdir. Və bu, ondan da bəlli olur ki, Ukraynaya verilən silah və texnikaların miqdarı və tipləri sanki onun qalib gəlməsi üçün yox, savaşın, yəni prosesin davam etməsi, alovun sönməməsi məqsədi güdür. Maraqlıdır ki, elə Rusiya da hərbi əməliyyatları elə bu cür taktikaya uyğun aparır. Hazırda Ukrayna və Rusiya orduları əsasən hələ 2014-cü ildən bəri müdafiə imkanları yaratdıqları ərazilərdə, yəni Donbasda vuruşurlar. Digər ərazilərdə, Xarkov, Xerson ətrafında demək olar ki, güclü döyüşlər getmir. Kiyev üzərinə yol, demək olar ki, açıqdır. Yəni orada güclü istehkamlar-filanlar yoxdur… Yalnız ara-sıra Rusiya tərəfinin kütləvi raket, dron hücumları həyata keçirilir. Ukrayna da belə hücumları etməyə cəhd göstərir. Amma bütövlükdə genişmiqyaslı hərbi əməliyyatlardan söhbət getmir. Bir sözlə, məntiqə, hərbi qaydalara uyğun olmayan, süni xarakter daşıyan bir müharibə aparılır. Ona görə də hansı tərəfsə nəsə bəyan edirsə, hamısı təbliğati, informasiya savaşı xarakteri daşıyır…
“Yəni belə çıxır ki, bu Rusiya-Ukrayna savaşının 2024-cü ildə də bitməsindən danışmağa dəyməz?” sualını isə keçmiş xarici işlər naziri bu cür cavablandırıb:
“Hansısa fasilə yaranacağından söhbət gedə bilər. Əslinə qalsa, indi də fasilədir. Atəşkəs imzalanmasa da, öncə dediyim kimi, yalnız qarşılıqlı raket, dron hücumlarıyla müşayiət olunan lokal toqquşmalar gedir… Sanki iki slavyan xalqının – Rusiya və Ukrayna xalqlarının maraqlarına zidd olan qanlı bir səhnə, tamaşa oynanılır…”
Sultan Laçın
