Türkiyə İran və ABŞ arasında mübahisələrin həllində vasitəçi kimi çıxış etməyə hazırdır və müvafiq əlaqələri davam etdirəcək.
Millətin Səsi.az xəbər verir ki, bu sözləri Türkiyə prezidenti Rəcəb Tayyib Ərdoğan bildirib.
Səudiyyə Ərəbistanının “Asharq əl-Awsat” qəzetinə müsahibəsində “İcazə verin sizi əmin edim ki, biz İran və ABŞ arasında gərginliyi azaltmaq və problemləri həll etmək üçün vasitəçi kimi xidmət etməyə hazırıq. Bu yolda təmaslarımızı davam etdirəcəyik” deyib.
“Biz bütün platformalarda İrana qarşı istənilən hərbi addıma qarşı çıxmışıq”, – o vurğulayıb.
Diplomatik səylərə toxunan Ərdoğan qeyd edib ki, Türkiyə öz fəaliyyətlərini regiondakı tərəfdaşları ilə əlaqələndirir.;”Biz dost ölkələrlə, o cümlədən Səudiyyə Ərəbistanı və Pakistanla əlaqələrimizi davam etdiririk. Biz bu məsələyə blok və ya müttəfiqlik zehniyyəti ilə yanaşmırıq”.
Çərşənbə axşamı Ərdoğan rəsmi səfərlə Səudiyyə Ərəbistanına gəlib. O, vəliəhd şahzadə və baş nazir Məhəmməd bin Salman Əl-Səudla danışıqlar aparacaq. Bölgəyə iki günlük səfəri çərçivəsində Türkiyə lideri Misirə də səfər etməyi planlaşdırır.
