“Bu, kəskin etiraza səbəb olub, dini və milliyyətçi xarakterli çaxnaşma yaradıb…”
Qüdsdən olan yəhudi müsəlman qəbiristanlığını təhqir etdiyinə görə məhkəmə qarşısına çıxarılacaq
Qüdsün 35 yaşlı sakini ulağı öldürməkdə və onun başını İsrail paytaxtının müsəlman qəbiristanlığının hasarından asmaqda ittiham edilir.
Moderator.az xəbər verir ki, bu barədə “israelan.com” nəşri yazıb.
Məlumatda deyilir ki, bu gün prokurorluq Qüdsün 35 yaşlı sakini Yehezkel Varşuyerə qarşı cinayət işinin mareriallarını məhkəməyə təqdim edib.
İttiham rəyinə görə, başqa bir hüquq pozuntusuna görə ev dustaqlığında olan cinayətkar Kefar Adummim kəndində ulaq əldə edərək onu maşınının yük yerinə yerləşdirib və balta ilə silahlanaraq Qüdsə yollanıb.
“Bab ər-Rəhma” qəbiristanlığının yaxınlığında ittiham edilən heyvanın başını kəsib və onu qəbiristanlığın hasarından asıb.
O, bunu elə tərzdə edib ki, ulağın sifəti hasarın yanındakı məzarlara tərəf yönəlsin.
“Qəbiristanın hasarından asılan ulağın başının fotoşəkli sosial şəbəkələr və ərəbdilli kütləvi informasiya vasitələrində yayılaraq kəskin reaksiya doğurub, həmçinin dini və milliyyətçi xarakterli çaxnaşmaya səbəb olub”, – ittiham rəyində deyilir.
Qüds sakininə qarşı bir sıra maddələr, o cümlədən “icazəsiz olaraq dini ayin/dəfn yerinə daxil olmaq” maddəsi üzrə ittihamlar irəli sürülüb.
İttiham rəyində həmçinin “ev dustaqlığı şərtlərinin pozulması”, “heyvana zərər vurulması”, “heyvanla qəddar davranış” və “heyvan sahibinin hüquqlarının pozulması” ittihamları da var.
Prokurorluq məhkəmə prosesinin sonunadək müttəhimin həbsdə saxlanılması barədə vəsatət qaldırıb.
