“Çox şükür ki, nəhayət, 15 il sonra, Allah qismət etdi və siyasi iradə və ordumuzun təxminən bir sutkalıq fəaliyyəti sayəsində Qarabağın dağlıq hissəsində belə bir əməliyyat keçirildi həmin ərazimizdə separatçılığa, terrorçuluğa son qoyuldu…”
“Erməni hərbçiləri ilə bərabər Azərbaycanın Qarabağ torpaqlarından Rusiya qoşunları da çıxsaydı, daha gözəl olardı… Amma nə edək ki, reallıq budur və Rusiya hərbi kontingentini 10 noyabr üçtərəfli bəyanatına əsasən Azərbaycan hökuməti öz imzasıyla dəvət edib… Lakin bütün bunlara rəğmən 19-20 sentyabr 2023-cü ilin ən yaddaqalan tarixi bir günü oldu”.
Klassik Xalq Cəbhəsi partiyasının sədri, istiqlalçı millət vəkili Mirmahmud Mirəlioğlu bu fikirləri moderator.az-a açıqlamasında 2023-cü ilin yaddaqalan əhəmiyyətli hadisələri haqda danışarkən dilə gətirib.
“2023-cü il Azərbaycan tarixinə gerçəkdən də ciddi, yaddaqalan hadisələrlə yazıldı. On illərlə yaşadığımız müddətdə respublikamızla bağlı arzularımızın böyük əksəriyyəti gerçəkləşdi. Qələbəmizin tam təmin olunması istiqamətində gərəkli addımlar atıldı. Xocalıda, Xankəndində də və bu minvalla, 8 anklav kəndimiz istisna olmaqla, Quzey Azərbaycan Respublikasının bütün ərazisində Azərbaycanın üçrəngli bayrağı dalğalanmağa başladı. Bütün bunlar bizim arzuladıqlarımız idi…
Bilirsiz, 2020-ci ilin 44 günlük savaşın nəticələri bizi tam qane etmirdi. Ona görə ki, hələ işğal altında qalan ərazilərimiz vardı”.
Partiya sədri bildirib ki, Azərbaycanın Yuxarı Qarabağ ərazisindəki Rusiya hərbçiləri “sülhməramlı” adlansalar da, mahiyyətcə işğalçıdırlar.
“Bir sözlə, 2023-cü il qələbə ili oldu. Ancaq təəssüflər olsun ki, işğalçı Rusiya qoşunları hələ də Qarabağda – Azərbaycan ərazisində qaldı. Rusların burada qalmasının müddəti təxminən bəlli olsa da, onların özlərinin iddiaları var. Hətta Putin çəkinmədən başqa fikirlər də səsləndirir. 10 noyabr üçtərəfli bəyanatına uyğun olaraq Rusiya hərbçilərinin ərazimizdə qalma müddəti 2025-ci ilin noyabrında bitməlidir. Onların adı “sülhməramlı” olsa da, mahiyyətcə işğalçıdırlar. Erməni hərbçiləri ilə bərabər Azərbaycanın Qarabağ torpaqlarından Rusiya qoşunları da çıxsaydı, daha gözəl olardı… Əgər iki yüz ildən artıq müddətdə Azərbaycan ərazilərini işğal edən, elə Qarabağda həmin erməni separatizminin təməlini qoyan, nəinki Qarabağın, Zəngəzurun, Göyçənin, Borçalının, həm də Dərbəndin işğalına, Azərbaycan torpaqlarının param-parça olmasına səbəb olan çar Rusiyası, SSSRİ, Rusiya Federasiyası adı daşıyan bir imperiyanın ordusu torpağımızdadırsa, deməli, ərazi bütövlüyümüz əsasən bərpa olunsa da, suverenliyimiz tam bərpa edilməyib… Amma nə edək ki, reallıq budur və Rusiya hərbi kontingentini 10 noyabr üçtərəfli bəyanatına əsasən Azərbaycan hökuməti öz imzasıyla dəvət edib… Lakin bütün bunlara rəğmən 19-20 sentyabr 2023-cü ilin ən yaddaqalan tarixi bir günü oldu. Həmin gün keçirilmiş antiterror əməliyyatı nəticəsində Qarabağın dağlıq ərazisinin qalan hissəsi də erməni işğalından azad olundu”.
Mirmahmud Mirəlioğlu hələ 15 il öncə Qarabağın dağlıq hissəsindəki separatçı erməni rejiminə qarşı antiterror əməliyyatı planı hazırlamaqları və bunu Azərbaycanın dövlət və hökumət qurumlarına təqdim etməkləri haqda da danışıb.
“Onu da deyim ki, biz illər öncə – hələ 2008-ci ildəki prezident seçkilərindən öncə Yuxarı Qarabağdakı separatçı rejimin məhvi üçün hazırladığımız antiterror əməliyyatı planını Prezident Administrasiyasına, Milli Məclisə, Nazirlər Kabinetinə, Milli Elmlər Akademiyasına və s. təqdim etmiş və belə bir əməliyyatın keçirilməsini istəmişdik. Həmin planı biz partiyamız və daxil olduğumuz “Azadlıq” bloku adından təqdim etmişdik. Sadaladığım yerli, eləcə də Qərbin, Avropanın heç bir qurumu bu məsələ ilə maraqlanmadı. Yalnız ABŞ-ın Azərbaycandakı o vaxtkı səfiri xanım Enn Dörsinin diqqətini çəkmişdi və o, bununla bağlı bizi görüşə dəvət etmişdi. Öncə görüş üçün yarım saat vaxt ayıracağını demişdi. Lakin söhbət ABŞ səfiri üçün də çox maraqlı olduğundan görüş iki saatadək uzanmışdı. Xanım Dörsi hətta planın detallarıyla da maraqlanmışdı. Təbii ki, biz detalları açıqlamamış, yalnız ümumi xülasəsini vermişdik…
Çox şükür ki, nəhayət, 15 il sonra, Allah qismət etdi və siyasi iradə və ordumuzun təxminən bir sutkalıq fəaliyyəti sayəsində Qarabağın dağlıq hissəsində belə bir əməliyyat keçirildi həmin ərazimizdə separatçılığa, terrorçuluğa son qoyuldu”- deyə istiqlalçı deputat yekunlaşdırıb.
Sultan Laçın
