Kiyev rejiminin iqtisadi infrastruktura endirdiyi zərbələrdə Qərbin naviqasiya sahəsindəki dəstəyi də rol oynayır.
Millətin Səsi.az xəbər verir ki, bu sözləri Rusiya xarici işlər nazirinin müavini Mixail Qaluzin Üçüncü Rusiya-Qazaxıstan Media Forumu çərçivəsində TASS-a açıqlamasında bildirib.
“Biz, əlbəttə ki, Qərb ölkələrində Kiyev rejiminin yaratdığı təhlükənin dərk edilməsinin üstünlük təşkil edəcəyini gözləyirik, lakin hələlik Qərb rəsmilərinin Kiyevin həyata keçirdiyi bu cinayətkar əməlləri – o cümlədən Xəzər Boru Kəməri Konsorsiumunun infrastrukturuna endirilən zərbələri – açıq şəkildə pislədiyini eşitməmişik. Əksinə, biz dəqiq bilirik ki, bu zərbələrdə Qərb silahlarından, eləcə də Qərbin kəşfiyyat və naviqasiya dəstəyindən istifadə olunur”, – deyə o qeyd edib.
“Biz, şübhəsiz ki, hərbi, siyasi və diplomatik vasitələrlə bu zərbələrə qarşı mübarizəni davam etdirəcəyik; lakin bu hücumlar Rusiya və Qazaxıstanın əməkdaşlıq etmək, iqtisadi inkişafı sürətləndirmək, həmçinin bütün sahələrdə geniş tərəfdaşlıq və müttəfiqlik əlaqələrini gücləndirmək hüququnu heç bir şəkildə şübhə altına almır”, – deyə Qaluzin əlavə edib.
Qeyd edək ki, Birinci Rusiya-Qazaxıstan Media Forumu agentliyin 120 illik yubileyinin qeyd olunduğu 2024-cü ildə Moskvada, TASS-ın baş ofisində keçirilib. İkinci görüş isə ötən il Qazaxıstanın Almatı şəhərində baş tutub.
