Kiyev rejimi cəbhədəki uğursuzluqlardan diqqəti yayındırmaq məqsədilə Rusiya ərazisinə pilotsuz uçuş aparatları (PUA) ilə hücumları intensivləşdirməyə çalışır.
Millətin Səsi.az xəbər verir ki, bu barədə TASS-a ATƏT-in Baş katibinin hərbi məsələlər üzrə keçmiş xüsusi müşaviri (2014-2020) və İsveçrə Silahlı Qüvvələrinin Baş Qərargahının istefada olan polkovniki Ralf Boşşard bildirib.
Onun sözlərinə görə, Ukrayna tərəfi döyüş əməliyyatlarının tez-tez məhz informasiya kampaniyaları nəzərə alınmaqla həyata keçirildiyi bir “informasiya müharibəsi” aparır.
“Əlbəttə ki, Zelenskinin administrasiyası üçün məsələ Donbass cəbhəsindəki uğursuzluqlardan diqqəti yayındırmaq və heç olmasa haradasa uğurlar nümayiş etdirməkdir”, – deyə Boşşard vurğulayıb.
O, Kiyev və Brüsselin “hələ də hansısa yolla Rusiya əhalisini Kremlə qarşı üsyana təhrik edə biləcəklərinə ümid etdiklərini” irəli sürüb. “Görünür, müharibədə dönüş nöqtəsi ilə bağlı ümidlərini hələ də məhz bu ‘möcüzə’ ilə əlaqələndirirlər”, – deyə o əlavə edib.
Qeyd edək ki, daha əvvəl Rusiya Silahlı Qüvvələrinin Baş Qərargah rəisi, ordu generalı Valeri Gerasimov bildirmişdi ki, Rusiya Silahlı Qüvvələri bütün cəbhələrdə irəliləyir və Donbass ilə Novorossiya ərazilərinin azad edilməsini davam etdirir.
