Moldova Respublikası Sosialistlər Partiyasından (PSRM) olan deputatlar Konstitusiya Məhkəməsinə (MK) dövlət dilinin adının Moldova dilindən Rumın dilinə dəyişdirilməsinə etiraz üçün məhkəməyə müraciət edəcək.
Bu barədə bazar ertəsi TASS-a deputat Vasili Bolya bildirib.
“Konstitusiya Məhkəməsinə iddia hazırlayırıq. Əgər bu qanun layihəsi ikinci oxunuşda bəyənilsə və ya dərc olunmaq üçün ölkə prezidentinə göndərilsə, o zaman Konstitusiya Məhkəməsinə müraciət edəcəyik. Konstitusiyaya dəyişiklik edilməsi ilə bağlı normalara əməl olunmayıb”,- o deyib.
Onun fikrincə, konstitusiyaya dəyişiklik edən qərarlar ümumxalq səsverməsi və ya parlament deputatlarının üçdə ikisinin səsi ilə təsdiqlənir. Lakin bu qanun layihəsi birinci oxunuşda bəyənilib, 101 deputatdan cəmi 56-sı dəstəkləyib.
“Mən belə qənaətə gəldim ki, bu qanun layihəsi adi layihə kimi hazırlanıb və bir oxunuşda iştirak edən deputatların əksəriyyəti tərəfindən bəyənilib. Bu mənada ikinci oxunuş keçirə bilərlər, ya da təsdiq üçün dərhal prezidentə göndərə bilərlər”, – deyə parlamentin hüquq, təyinatlar və toxunulmazlıq komissiyasının sədr müavini vəzifəsini daşıyan deputat bildirib.
