Milli Məclisdəki büdcə müzakirələrində çıxış edən deputat Sabir Rüstəmxanlı Baş nazir Əli Əsədovun iclasda iştirakından istifadə edib bəzi problemləri qaldırıb.
Milletinsesi.az Musavat.com-a istinadən xəbər verir ki, millət vəkili müəyyən bir dövrdə Azərbaycanda kitabxanalara ehtiyac olmaması barədə yanlış yanaşmadan danışıb.
“Kitabxanalar bağlanıb, rayonlara kitablar getmir. Oxumayan millətin gələcəyi necə olacaq? Heç olmasa mövcud olanlar qorunub-saxlanılsın”, – S.Rüstəmxanlı bildirib.
Daha sonra deputat bildirib ki, seçildiyi Neftçala qaz çıxarılan rayondur. Amma qaz kəməri kəndlərin yanından keçsə də, həmin yaşayış məntəqələrində qaz yoxdur:
“Bu dövlətin müstəqilliyində böyük zəhməti olmuş Xəlil Rza Ulutürkün doğulduğu kənddə qaz yoxdur. Qaz xətti isə kəndin yanından keçir”.
S.Rüstəmxanlı doğulduğu kəndin də qaz problemindən bəhs edib:
“Bu Məclisdə Yardımlının Hamarkənd kəndiindən iki millət vəkili təmsil olunur: mən və Musa Qasımlı. Qaz xətti bizim kəndin 3 km-liyindən keçir, amma sakinlər qaz üzünə həsrətdir. Bu 3 km nədir ki? 1,5 km-i bir deputatın, 1,5 km-i digər deputatın payına düşür. Onda imkan versinlər, camaat öz hesabına qaz çəksin. Qarabağ meşələri kimi unikal meşələr qırılıb məhv edilir. Mən xahiş edirəm, Əli müəllim, bu problemin həlli üçün göstəriş verəsiniz! Cənab Prezidentə bir vaxt müraciət etdim, bir sərəncamı ilə 8 kəndə yol çəkildi, indi camaat o yoldan rahat şəkildə istifadə edir. İndi də qaz probleminin həllinə ehtiyac var. Mən el-obaya cavab verə bilmirəm ki, neçə ildir millət vəkiliyəm, öz kəndimizə qaz çəkdirə bilmirəm. Onda millətin dərdini necə həll edə bilərəm?”
Spiker Sahibə Qafaraova çıxışa reaksiyasında dedi ki, indiyədək bir çox məsələlər həllini tapıb, 3 km-lik qaz xətti məsələsi də həllini tapar.
