İspaniyanın Posada de Llanes şəhərindəki “Solymar” otelinin restoran-barında hər səhər heyrətamiz bir hadisə baş verir.
Moderator.az Lent.az-a istinadən xəbər verir ki, Pako adlı qarğa 26 ildir ki, bu müəssisənin daimi və sadiq müştərisidir. Yuvasından düşən quş bar sahibləri tərəfindən xilas edildikdən sonra o, məkanın ayrılmaz müştərisinə çevrilib. Bar hər dəfə açılanda Pako səhər yeməyinə uçub gəlir. Ofisiantlar Pakonu ailənin üzvü adlandırır və onun ən tələbkar müştərilərdən biri olduğunu, hər zaman xoşuna gələni seçdiyini deyirlər.
Otel sahibləri quşun bara girən hər kəsi “salam” deyərək nəzakətlə salamladığını əks etdirən videonu yayımladıqdan sonra Pakonun hekayəsi sosial media fenomeninə çevrilib. Quşun heyrətamiz danışma qabiliyyəti var və nəzakəti ilə hamını heyran edir.
Pako həm daimi müştərilərin, həm də yeni ziyarətçilərin diqqətini cəlb edən əsl ulduza çevrilib.
