Kreml təbliğatçıların sözlərinə görə, Rusiya prezidenti cümə axşamından şənbə günü günortaya kimi qara kostyumunu və qara qalstukunu çıxarmayıb.
Moderator.az xəbər verir ki, bu haqda “TSN” məlumat yayıb.
Moskva yaxınlığındakı “Crocus City Hall” konsert kompleksində törədilən terror aktından sonra ilk dəqiqələrdə çəkildiyi iddia edilən videonu dərc etməklə Rusiya təbliğatı Rusiya prezidenti Vladimir Putini “bütün rusların qayğıkeş atası” kimi təqdim etməklə həddi aşıb.
Rusiyanın “VGTRK” dövlət media holdinqinin təbliğatçısı Pavel Zarubin tərəfindən öz telegram- kanalında yayılan videoda Putinin martın 22-də axşam saatlarında baş verən terror aktının ilk dəqiqələrindən öz kabinetində hazır vəziyyətdə olduğu və əlini “hadisələrin nəbzi”ndə tutduğu iddia edilir.
Putin terror aktının “ilk dəqiqələrindən” 17 saat sonra, şənbə günü, martın 23-də ruslara müraciətini çatdırarkən məhz bu geyimdə videoda görünəcəkdi…
Təbii ki, fantaziyanızı uzadıb güman edə bilərsiniz ki, rus diktatoru cümə axşamından şənbə günü günortaya kimi bu yas kostyumunu çıxarmayıb və paltar dəyişməyə vaxt tapmadan bütün gecəni işləyib.
Ancaq daha çox ehtimal olunan versiya odur ki, həm terror aktından sonrakı “ilk dəqiqələr”, həm də ruslara edilən müraciətlər eyni vaxtda qeydə alınıb.
Ən azı cümə günü, martın 22-də Rusiya Təhlükəsizlik Şurasının üzvləri ilə Kreml sahibi tərəfindən sevilən “neonasistlər” mövzusunda görüş zamanı Rusiya təbliğatçılarının videosundan göründüyü kimi, Vladimir Putin boz-göy kostyum və alabəzək qalstuk geyinmişdi…
Ola bilsin ki, həmin günün axşamı pis bir şey “gözləyən” Rusiya prezidenti qəfildən yas kostyumu geyinmək qərarına gəlib. Amma bu, artıq terror aktının təşkilatçısı haqqında tamamilə fərqli düşüncələrə səbəb olur…
Xatırladılır ki, martın 22-də axşam saatlarında Moskva vilayətindəki “Crocus City Hall”da “Piknik” qrupunun konserti zamanı atışma baş verib. Binada da partlayış olub, bundan sonra yanğın başlayıb.
Tezliklə Rusiya hakimiyyət orqanları Ukrayna ilə sərhəd yaxınlığında terrorçuların saxlanıldığını bildiriblər. Rusiya “FSB” onların “Ukrayna tərəfində müvafiq əlaqələri” olduğunu iddia edir.
Eyni zamanda Belarusun Rusiyadakı səfiri Dmitri Krutoy bildirib ki, Moskva yaxınlığındakı “Crocus City Hall” konsert zalında törədilən terror aktından sonra Belarus xüsusi xidmət orqanları Rusiya təhlükəsizlik qüvvələrinə terrorçuların Belarusla sərhədi keçərək qaçmasının qarşısını almağa kömək ediblər.
O da xatırladılır ki, şənbə günü, martın 23-də qondarma “İslam Dövləti” (“İŞİD”) terrorçu qruplaşması Moskvanın kənarındakı “Crocus City Hall” konsert zalına hücumun təfərrüatları ilə bağlı bəyanat yayıb. Terror aktı İslam Dövləti ilə “İslamla mübarizə aparan ölkələr” arasında müharibə ilə izah olunur.
S.Laçın
